Platfform cymunedol Sacyr UK yn mynd o nerth i nerth
Yn ystod y ddau fis cyntaf ers lansio Platfform Cymunedol ar-lein Acorn/Sacyr UK, mae mwy na 61 o oriau o e-ddysgu wedi'u cwblhau.
Nod y platfform ar-lein, a lansiwyd ym mis Chwefror gan yr Aelod Senedd lleol Julie Morgan AS, oedd gwneud gwerth cymdeithasol a gweithio yng nghymuned de Cymru yn brofiad mwy cydweithredol. Mae hefyd yn anelu at helpu i uno busnesau a grwpiau cymunedol lleol, gan greu cyfleoedd gwirfoddoli ac elusennol newydd.
Yn ogystal â hyn, mae ganddo fforwm ar-lein, ond mae'n llawer mwy na hynny – mae hefyd yn rhywle lle gall pobl adeiladu eu CV a chael mynediad at fyrddau swyddi. Ac mae ganddo un stori lwyddiant eisoes, gan iddo helpu Ben Shears, 18 oed, i gael ei gam cyntaf ar yr ysgol yrfa. Creodd ei CV ar y platfform a gwnaeth gais llwyddiannus am rôl prentisiaeth a oedd yn cael ei hysbysebu ar fwrdd swyddi'r platfform.
Mae'r platfform hefyd yn cynnig tiwtorialau gwyddoniaeth, technoleg, peirianneg a mathemateg (STEM) ar-lein ar gyfer plant oedran ysgol uwchradd, ac yn caniatáu i bobl leol gael mynediad at Lyfrgell Offer a gwersi fideo ar sut i ddefnyddio'r offer y maent yn eu cymryd ar fenthyg.
Dywedodd Joanne Okeefe, Cydlynydd Buddion Cymunedol Sacyr UK: “Mae’n wych gweld bod y platfform eisoes yn cael ei ddefnyddio’n helaeth gan gynifer o bobl yn y gymuned. Roeddem mor falch o weld faint o oriau o e-ddysgu oedd wedi cael eu cyrchu a'u cwblhau ychydig wythnosau yn unig ar ôl i ni lansio'r platfform.
“Rydym yn falch iawn o’r hyn rydym wedi’i adeiladu gyda’r platfform a chredwn mai dyma un o’r cyntaf i gael ei greu gan gwmni adeiladu i helpu i hwyluso gwerth cymdeithasol cydweithredol. Mae sawl ffordd o'i ddefnyddio ac mae'n cynnwys llawer iawn o adnoddau, mae wir yn lle y gallwch dreulio ychydig oriau yn hawdd a dysgu popeth o sut i ddefnyddio teclyn pŵer, i sut i roi rhywbeth yn ôl i'ch cymuned leol trwy wirfoddoli. Nid oes llawer o wefannau un stop fel hyn ar gael, felly rydym yn falch o fod wedi creu un ar gyfer cymuned de Cymru lle rydym yn gweithio.”
I gael mynediad at blatfform cymunedol Acorn, ewch i: https://acorn-sacyr.dreams-lms.org/rcd/login.php
