Cymerodd Sacyr UK ran ym menter Byd Gwaith Gwyddoniaeth, Technoleg, Peirianneg a Mathemateg (STEM) Techniquest – digwyddiad dau ddiwrnod a gynlluniwyd i ysbrydoli'r genhedlaeth nesaf. 

Roedd dros 500 o ddisgyblion rhwng saith ac 11 oed yn bresennol, a hynny o 15 o ysgolion cynradd ledled De-ddwyrain Cymru, pob un yn awyddus i archwilio'r amrywiaeth eang o yrfaoedd STEM sydd ar gael. 

Trwy gydol y digwyddiad, bu'r disgyblion yn ymgysylltu â chyflogwyr o bob cwr o'r rhanbarth, gan ofyn cwestiynau, darganfod syniadau newydd, a chymryd rhan mewn gweithgareddau STEM ymarferol. Y nod oedd tanio chwilfrydedd a helpu dysgwyr ifanc i'w gweld eu hunain mewn rolau STEM yn y dyfodol. 

Ariannwyd presenoldeb pob ysgol yn llawn gan Ymddiriedolaeth Edina; mae cymorth yr ymddiriedolaeth yn sicrhau bod disgyblion mewn ardaloedd difreintiedig yn cael mynediad at brofiadau addysgol tebyg i hwn. Chwaraeodd ei chyfraniad ran allweddol trwy sicrhau bod y digwyddiad yn hygyrch ac yn hwyl. 
Roedd Sacyr UK yn falch o fod yn rhan o fenter mor ysbrydoledig, a oedd yn helpu i greu cyfleoedd i ddisgyblion ac annog diddordeb gydol oes mewn STEM. 

Cymerodd Sacyr UK ran mewn Diwrnod Blasu yr Amgylchedd Adeiledig ar gyfer disgyblion ôl-16, wedi'i drefnu gan Gydwasanaethau'r GIG a Sefydliad Brenhinol y Syrfewyr Siartredig (RICS). Cynhaliwyd y digwyddiad gan Brifysgol De Cymru yn Nhrefforest, lle cafodd 30 o fyfyrwyr o Goleg Merthyr a Choleg Caerdydd a'r Fro glywed am opsiynau addysg uwch gwahanol ar gyfer astudio'r amgylchedd adeiledig. Cafodd y myfyrwyr hefyd gyfle i ymgysylltu â chyflogwyr yn y diwydiant adeiladu. 

Yn rhan o'r diwrnod blasu, medrodd y myfyrwyr gymryd rhan mewn profiadau ymarferol a oedd yn ffocysu ar yr amgylchedd adeiledig, gan gynnwys cystadleuaeth mesur, gweithgaredd ‘adeiladu tref’, arddangosiad o gynnal arolwg o adeilad, a dysgu am brisio. 

Cynlluniwyd y digwyddiad i roi dealltwriaeth i'r myfyrwyr o'r amgylchedd adeiledig a'r gyrfaoedd sydd ar gael yn y diwydiant adeiladu. 

Ashley, Ella a Jack yw'r tri myfyriwr graddedig cyntaf i gwblhau'r Academi Cynhwysiant Anabledd, ac mae'r tri wedi cael eu cyf-weld ar gyfer swyddi cyntaf posibl ar safle Canolfan Ganser Newydd Felindre. 

Mae'r Academi Cynhwysiant Anabledd yn ymdrech ar y cyd rhwng Sacyr UK a'r National Diversity Employment and Advisory Service Ltd (NDEAS). Mae'r fenter yn cefnogi pobl sydd wedi bod yn ddi-waith oherwydd anabledd, a hynny trwy ddarparu cyfleoedd iddynt gymryd y cam cyntaf tuag at yrfa yn y diwydiant adeiladu. 

Mae'r rhaglen bythefnos o hyd yn gwahodd hyfforddeion i ddysgu hanfodion y diwydiant adeiladu. Ar ôl cwblhau'r rhaglen, roedd o leiaf un o'r hyfforddeion yn sicr o gael swydd gyda Sacyr UK yn rhan o dîm  prosiect Canolfan Ganser Newydd Felindre – er i bob un gael cyfweliad ar gyfer swyddi. 

Ashley oedd y myfyriwr graddedig cyntaf i gael cynnig rôl gyda Sacyr UK, a dyma oedd gan ei fam, Sarah, i'w ddweud: “Roedd Ashley'n cael trafferth yn yr ysgol, a chafodd ddiagnosis o awtistiaeth yn ddiweddar. Gadawodd heb fawr ddim cymwysterau a dim llawer o hyder. Clywodd fy chwaer am yr academi, a rhoddodd fi mewn cysylltiad â Hannah, sy'n aelod o'r tîm gwerth cymunedol yng Nghanolfan Ganser Newydd Felindre. Ar ôl llenwi holiadur syml, galwodd Dan o NDEAS, rhannu ei stori, a derbyn Ashley i'r rhaglen."

“Roedd yn nerfus iawn ar ei ddiwrnod cyntaf, ond dydy e ddim wedi edrych 'nôl. Erbyn yr ail ddiwrnod, roedd Ashley'n dod adref yn llawn cyffro am yr hyn yr oedd wedi'i ddysgu, gan siarad am Dan a'i ffrindiau newydd, ac erbyn diwrnod tri roedd yn dal y trên yn hyderus ar ei ben ei hun. Mae'n wych bod Ashley wedi cael cynnig swydd, a hynny yn ôl ei rinweddau ei hun. Maen nhw wedi gweld ei botensial, ac mae dim ond cael cynnig y rôl wedi rhoi hwb eithriadol i'w hyder.”

Bydd Ashley 'nawr yn dechrau ar ei rôl fel Cynorthwyydd Cymorth yr Academi yn cyflawni tasgau gweinyddol sy'n gysylltiedig â'r academïau hyfforddi unigol. Mae ei gyfrifoldebau'n cynnwys rheoli taenlenni a systemau mewnol, cydlynu gwybodaeth rhaglenni, a rhannu arfer gorau ledled yr academi. 

Ymunodd Sacyr UK â Women in Property a'r elusen ddigartrefedd, Llamau, yn Stadiwm Dinas Caerdydd i nodi Diwrnod Rhyngwladol y Menywod, gan gynrychioli menywod ym maes adeiladu. 

Wedi'i noddi gan Gymdeithas Adeiladu'r Principality, roedd y digwyddiad yn ffocysu ar thema Diwrnod Rhyngwladol y Menywod eleni, sef Rhannu a Rhoi – nodyn atgoffa pwerus y gall gweithredoedd caredig bach, bwriadol greu effaith barhaol. 

Gyda 95 o fenywod yn rhan o'r gwaith o adeiladu Canolfan Ganser Newydd Felindre ar hyn o bryd, mae Sacyr UK yn cydnabod pwysigrwydd creu llwyfannau lle gall menywod yn y diwydiant rannu eu profiadau a bod yn esiamplau gweledol ar gyfer cenedlaethau'r dyfodol. Roedd y digwyddiad yn gyfle i ddathlu cyflawniadau, rhannu mewnwelediadau, a thynnu sylw at werth arweinyddiaeth gynhwysol. 

Roedd y drafodaeth yn archwilio'r modd y gall cynnig amser, sgiliau, eiriolaeth, nawdd neu adnoddau greu cyfleoedd newydd i unigolion a sefydliadau. Rhannodd y siaradwyr fyfyrdodau ysbrydoledig ynghylch sut y mae rhannu a rhoi wedi llunio eu gyrfaoedd, agor drysau annisgwyl, ac atgyfnerthu hyder i fenywod a merched. Gyda'i gilydd, mae'r gweithredoedd hyn o ddydd i ddydd yn helpu i gyflymu cynnydd o ran cynrychioli a grymuso menywod ledled y diwydiant adeiladu. 

Bu Sacyr UK, y prif gontractwr y tu ôl i Ganolfan Ganser newydd Felindre, yn cefnogi Menter Effaith Gymunedol trwy gyfrannu pren a byrddau plastr at rai o'i phrosiectau lleol. 

Un o werthoedd allweddol Sacyr UK yw darparu mwy nag adeiladau yn unig – ond hefyd gwaddol parhaol i'r cymunedau lleol y mae'n gweithio ochr yn ochr â nhw a gwaith partneriaeth â phrosiectau ac elusennau lleol. 

I'r perwyl hwnnw, bu'r prif gontractwr yn cefnogi Menter Effaith Gymunedol trwy roi deunyddiau adeiladu, yn arbennig pren a phlastr, i helpu dwy o raglenni trawsnewidiol y Fenter: Women Construct Wales a phrosiect Sustaining a Legacy.
Yn sgil ymdrechion aelodau Tîm Buddion Cymunedol Sacyr UK, Hannah Jenkins a Joanne O'Keefe, bydd y deunyddiau’n gymorth uniongyrchol ar gyfer dysgu ymarferol, adfywio eiddo, a datblygu sgiliau i bobl leol.

Dywedodd Hannah Jenkins: “Cawn ein hysbrydoli o hyd gan y gwaith dan arweiniad Abi Lewis a thîm ehangach y Fenter, sy’n creu cyfleoedd, yn magu hyder, ac yn darparu gwerth cymdeithasol parhaol sy'n gwneud gwahaniaeth gwirioneddol ledled y rhanbarth. Rydym yn falch o gynnig cymorth parhaus iddynt gyda'r prosiectau hyn a byddwn yn parhau i helpu lle bynnag a phryd bynnag y gallwn.”

Roedd staff Sacyr UK, y prif gontractwr sy’n adeiladu Canolfan Ganser newydd Felindre, yn falch o ddod at ei gilydd a gwisgo coch gyda’u cyd-weithwyr yn GIG Felindre i nodi Diwrnod Canser y Byd.

Dychwelodd ymgyrch Gwisgo Coch Felindre ar gyfer 2026, ac roedd tîm Sacyr UK yn fwy na pharod i gymryd rhan a chefnogi menter mor ystyrlon. 
Mae’r ymgyrch flynyddol yn annog pobl i wisgo coch a gwneud rhodd ar yr un diwrnod bob blwyddyn, i helpu i hybu ymwybyddiaeth a chodi arian hanfodol i frwydro yn erbyn canser – gan fod canser yn effeithio ar hanner poblogaeth y DU ar ryw adeg yn eu bywydau, mae’r angen am roddion a chymorth i gleifion yn parhau i gynyddu.

Caiff pob punt a godir trwy’r ymgyrch Gwisgo Coch ei hail-fuddsoddi’n uniongyrchol mewn rhaglenni cymunedol a gwasanaethau canser ledled Cymru, gan wella’r gofal a’r gefnogaeth y mae cleifion yn eu cael gan Ymddiriedolaeth GIG Felindre. 

Mae Sacyr UK yn parhau i gefnogi Ymddiriedolaeth GIG Felindre nid yn unig wrth adeiladu’r cyfleuster newydd, ond hefyd mewn llawer o fentrau codi arian trwy gydol y flwyddyn, a bydd yn parhau i wneud hynny. 

Every pound raised through the Wear Red campaign is reinvested directly into community programmes and cancer services across Wales, improving the care and support patients receive from the Velindre NHS Trust. 

Sacyr UK continues to support the Velindre NHS Trust not just in the building of the new facility, but also in many fundraising initiatives across the year and will continue to do so. 
 

Bydd Kier yn mynychu achlysur Marketplace Live yn Stadiwm Dinas Caerdydd, dydd Mawrth 24 Mawrth 2026.

Dyma gyfle i ddarpar-bartneriaid yn y gadwyn gyflenwi gwrdd â thîm Kier Places i drafod gweithio gyda ni ar brosiect Canolfan Ganser newydd Felindre (VCC), sy’n cael ei hadeiladu gan Sacyr ac y disgwylir ei chwblhau yng Ngwanwyn 2027, pan fydd Kier yn dechrau darparu gwasanaethau rheoli a chynnal a chadw cyfleusterau’r Ganolfan dros gyfnod o 25 mlynedd.

Gan obeithio eich gweld chi yno.

Dydd Mawrth 24 Mawrth 2026 08:30 - 14:00 Stadiwm Dinas Caerdydd Caerdydd CF11 8AZ

Mae'r prif gontractwr sy'n adeiladu Canolfan Ganser newydd Felindre, Sacyr UK, wedi ennill Cyflogwr Partner Newydd y Flwyddyn yng ngwobrau blynyddol ACT Training. Cafodd y cwmni ei goroni yn enillydd y wobr am ei waith ar safle'r Eglwys Newydd. Aeth aelodau o dîm Buddion Cymunedol Sacyr UK i'r digwyddiad i gasglu'r wobr. Mae'n cydnabod cyflogwyr sy'n mynd yr ail filltir i fuddsoddi yn eu staff trwy ymdrechion hyfforddi ac uwchsgilio.

ACT Training yw un o brif ddarparwyr hyfforddiant y DU, ac mae'n cynnal ei wobrau blynyddol i ddathlu dysgwyr rhagorol, ynghyd â'r cyflogwyr sy'n eu cefnogi. Cynhaliwyd y gwobrau ar Gampws Heol Dumballs Coleg Caerdydd a'r Fro. Daeth yr enwebwyr at ei gilydd i ddathlu a mwynhau gwledd o fwyd a band byw. Gyda chategorïau yn amrywio o Brentis y Flwyddyn i'r Busnes Newydd Gorau, cafodd entrepreneuriaid ifanc ledled y DU eu cydnabod am eu llwyddiannau a'u gwaith caled. Mae Sacyr UK hefyd wedi cyrraedd y rhestr fer ar gyfer gwobr Datblygiad Newydd Gorau MIPIM am ei waith ar Ganolfan Ganser newydd Felindre. MIPIM yw prif ŵyl eiddo ac eiddo tirol y byd, sy'n cael ei chynnal yn Cannes bob blwyddyn.

Mae datblygwr Canolfan Ganser newydd Felindre, Sacyr UK, mewn cydweithrediad arloesol â chwmni Tai Cadarn, cwmni buddiant cymunedol Invisible Walls, Academi Adeiladu ar y Safle Cyngor Caerdydd, ac SGM Waste Management yn anelu at gynnig cyfle i gyn-droseddwyr ddechrau gyrfa ym maes adeiladu.

Mae'r Fenter Cyflogaeth ar gyfer Cyn-droseddwyr yn rhaglen arloesol yn y diwydiant a fydd yn cynnig llety, mentoriaeth, a chyfleoedd gwaith ar safle'r Ganolfan i chwe chyn-droseddwr.

Mae'r rhaglen newydd hon yn rhoi cyfle allweddol i'r rheiny sy'n ceisio bywyd gwell ar ôl cael eu rhyddhau o'r carchar, gan roi iddynt yr offer y mae arnynt eu hangen i adeiladu bywyd newydd yn ystod cyfnod a all fod yn hynod gythryblus.

Mae'r fenter hon yn mabwysiadu dull cydweithredol, seiliedig ar dystiolaeth, o leihau aildroseddu trwy sicrhau cyflogaeth gynaliadwy, mentora sy'n ystyriol o drawma ac sy'n canolbwyntio ar gefnogaeth i deuluoedd, ynghyd ȃ datrysiadau sy'n ymwneud â thai diogel.

Dywedodd Kate Hathaway, y Rheolwr Ymgysylltu â Rhanddeiliaid a Buddion Cymunedol yn Sacyr UK: "Rydym yn falch iawn o gael cydweithio â chynifer o sefydliadau blaengar i allu creu cyfleoedd o'r fath i aelodau o'r gymdeithas sy'n ei chael yn fwyaf anodd."

"Hoffwn ddiolch i'n partneriaid am eu hymdrechion a'u hymroddiad i newid, ac edrychwn ymlaen at ddatblygu'r fenter hon ymhellach a chroesawu cyfranogwyr ar y safle cyn bo hir."

Mae'r contractwr sy'n adeiladu ein Canolfan Ganser Felindre newydd, wedi cyhoeddi bod Academi Cynhwysiant Anabledd gyntaf y DU yn y maes Adeiladu wedi cael ei lansio.

Mae'r fenter, sydd wedi'i lleoli ar safle adeiladu’r CGFn ac sydd yn cael ei rhedeg gan Sacyr UK, wedi'i chynllunio i gefnogi unigolion sydd wedi bod allan o waith oherwydd anabledd, trwy ddarparu pwynt mynediad clir i'r diwydiant adeiladu.

Mae'r academi yn ymdrech gydweithredol rhwng Sacyr UK a NDEAS (National Diversity Employment and Advisory Service). Bydd y rhaglen pythefnos o hyd i ddechrau, yn rhoi cyflwyniad syml i’r sector i hyd at ddeuddeg o bobl. Ar ôl cwblhau’r rhaglen, mae o leiaf un hyfforddai yn sicr o gael swydd gyda Sacyr UK ar y prosiect CGFn.

Mae'r CGFn yn un o'r prosiectau seilwaith mwyaf yng Nghymru, ac mae wedi'i threfnu i agor yn nhymor y gwanwyn 2027. Er mwyn sicrhau bod y safle’n gynhwysol i’r holl staff, mae Sacyr UK wedi buddsoddi mewn system lifft hygyrch sy’n darparu mynediad i bob lefel o’r adeilad, gan ei wneud yn amgylchedd adeiladu cwbl hygyrch.

Dywedodd Katie Hathaway, Rheolwr Ymgysylltu â Rhanddeiliaid a Buddion Cymunedol Sacyr UK: "Gyda chefnogaeth Ymddiriedolaeth GIG Prifysgol Felindre a Llywodraeth Cymru, mae'r cydweithrediad hwn wedi ein galluogi i ddatblygu rhaglenni sy'n creu llwybrau cyflogaeth ystyrlon a chynaliadwy i bobl sydd ag anableddau. Rydym yn falch dros ben o fod yn arwain y fenter bwysig hon".

Gallwch gael rhagor o wybodaeth a gwneud cais yma
 

Mentrodd aelodau pwyllgor cynllunio Cyngor Caerdydd trwy dywydd mis Ionawr i gael gweld y cynnydd gwych a wnaed gyda phrosiect Canolfan Ganser newydd Felindre. Daeth pymtheg aelod o adran a phwyllgor Cynllunio Cyngor Caerdydd i'r swyddfa ar safle Sacyr UK, y prif gontractwr sy'n adeiladu'r Ganolfan. Croesawyd hwy am daith bersonol o amgylch y safle gan Arweinydd Technegol y prosiect, Vincenzo Nigro, a Rheolwr y Tîm Buddion Cymunedol ac Ymgysylltu â Rhanddeiliaid, Katie Hathaway. Yn bresennol gyda'r grŵp roedd Mark Farrar, Cyfarwyddwr The Urbanists, yr ymgynghoriaeth cynllunio a fu'n rheoli'r gwaith o amlinellu proses y cais cynllunio ar gyfer y prosiect, a oedd yn cynnwys asesiadau o'r effaith ar yr amgylchedd.

Cafwyd cyflwyniad am gynnydd y prosiect gan Gyfarwyddwr Prosiect Sacyr Uk ar gyfer y Ganolfan, Elena Castro Blanco, ynghyd â gwybodaeth am y mentrau a'r arferion cynaliadwyedd y mae wedi'u cyflwyno i'r gwaith adeiladu. Mae'r mentrau hyn yn cynnwys technegau i warchod y pridd, y defnydd o frics Nelco sy'n amsugno carbon, ac wrth gwrs, y paneli allanol a'r ffrâm bren a osodwyd yn ddiweddar.

Gwahoddwyd staff yr adran gynllunio ac aelodau'r pwyllgor i'r safle hefyd, lle cawsant eu tywys o amgylch y gwaith adeiladu ei hun gan yr Arweinydd Technegol, Vincenzo. Aeth ati i ateb cwestiynau'r ymwelwyr, cynnig mewnwelediad i'r prosesau a ddefnyddiwyd i gyrraedd y pwynt hwn, ac esbonio camau nesaf y gwaith adeiladu. Dywedodd y Rheolwr Buddion Cymunedol, Katie Hathaway:

"Mae'n anhygoel gallu croesawu aelodau Pwyllgor Cynllunio Cyngor Caerdydd a rhoi golwg iddynt o'r holl ddarnau'n dod ynghyd. Ni allem fod yn fwy balch o'r hyn sydd gennym i'w ddangos."

Hoffai Sacyr ddiolch i Bwyllgor Cynllunio Cyngor Caerdydd am ei ymweliad â safle Canolfan Ganser newydd Felindre, ac edrychwn ymlaen at groesawu'r aelodau eto cyn bo hir.

Mae Sacyr UK, y prif gontractwr y tu ôl i Ganolfan Ganser Newydd Felindre, wedi partneru â'r elusen leol Ray of Light, sef elusen yng Nghaerdydd sy'n cefnogi pobl â chanser, i godi arian y mae mawr ei angen trwy gefnogi gwerthiant calendr 2026.

Mae Ray of Light yn cynhyrchu calendrau ffotograffau bob Nadolig, sy'n cynnwys delweddau trawiadol o natur a dynnwyd gan ei aelodau a'i gleientiaid. Roedd y celfyddydwaith a'r gofal a fuddsoddwyd yn y prosiect gan aelodau staff a chleifion, fel ei gilydd, wedi creu argraff dda ar aelodau Tîm Budd Cymunedol Sacyr UK, felly addawon nhw helpu cymaint â phosibl a mynd â chynifer o galendrau ag y gallent eu cario 'nôl i safle'r Ganolfan. Y targed oedd gwerthu pob un cyn cau'r safle dros y Nadolig.

Yn ffodus, nid oedd angen llawer o ymdrech oherwydd cafodd y calendrau eu prynu ymhen ychydig ddiwrnodau gan weithwyr hael ar draws y safle, gan godi dros £100 i'r elusen leol.

Bydd Sacyr UK yn parhau i gefnogi achosion lleol tebyg i Ray of Light, sy'n gweithio'n ddiflino i helpu pobl sy'n profi rhai o'r cyfnodau anoddaf yn eu bywydau.

Mae'n Wythnos Genedlaethol y Prentisiaethau, wythnos o ddathliad gan Lywodraeth y DU sy'n dod â busnesau a phrentisiaid ledled y wlad ynghyd, a hynny er mwyn amlygu effaith gadarnhaol prentisiaethau ar unigolion, busnesau, a'r economi ehangach.

I nodi hyn, bu i ni gysylltu â'n prentisiaid sy'n gweithio ar Brosiect Felindre, Caerdydd. Mae'n anodd credu bod chwe mis wedi mynd heibio'n barod ers i Sacyr UK & Ireland groesawu pedwar prentis newydd i Brosiect Felindre ... Mae sawl cyd-weithiwr yn teimlo bod yr ychwanegiadau newydd bellach yn rhan o'r dodrefn, cymaint yr ydynt wedi dod yn rhan o'r tîm!

Mae'r prentisiaid, Sam (Prentis y Tîm Budd Cymunedol), Lucy (Prentis y Tîm Dylunio Technegol), Ollie (Prentis y Tîm Mecanyddol a Pheirianneg), a Faith (Prentis y Tîm Cyllid) bellach yn agosáu at ddiwedd eu cyfnod prawf. I nodi Wythnos Genedlaethol y Prentisiaethau, rydym wedi cysylltu â nhw i weld sut y mae pethau arnynt.

Pan ofynnwyd iddo am ei amser gyda'r tîm Mecanyddol a Pheirianneg, dywedodd Ollie: "Rwy'n bennaf yn falch o'r modd yr wyf wedi newid ers fy misoedd cyntaf yma, ac mae hynny i'w ddisgwyl. Yn ddiweddar, rwyf wedi cael y cyfle i wneud mwy o waith pwysig ac annibynnol na fyddwn i erioed wedi gallu ei wneud pan ddechreuais yma." Yn ystod y misoedd cyntaf ers iddynt ddechrau eu hantur gyda Sacyr, mae'r prentisiaid wedi codi trwy'r rhengoedd o ran cyfrifoldebau, o gysgodi i ddechrau, a thyfu i ymgymryd â darnau o waith mwy annibynnol a hunangynhaliol.

"Dyma fy nhro cyntaf yn gweithio ar brosiect go iawn, felly rwy'n ddiolchgar bod y brentisiaeth hon wedi rhoi'r cyfle i mi fod yn rhan o rywbeth mor arwyddocaol,” meddai Prentis y Tîm Dylunio Technegol, Lucy. "Rwy'n rhan o dîm anhygoel sydd wedi bod yn gefnogol iawn, ac rwy'n dysgu llawer ganddynt." "Mae pob dydd yn her newydd, ond wastad mewn modd diddorol sy'n taflu goleuni,” meddai Prentis y Tîm Budd Cymunedol, Sam, pan ofynnwyd iddo sut yr oedd yn teimlo am ei brofiad. "Roedd yn braf bod yn rhan o adeiladu rhywbeth da."

Nid oedd modd i ni gynnal cyfweliad wyneb yn wyneb â Faith, am iddi roi genedigaeth i ferch fach ddiwedd y llynedd ac, o'r herwydd, bydd ar gyfnod mamolaeth am y dyfodol agos. Serch hynny, roeddem wedi cysylltu â Faith drwy neges, a dywedodd ei bod hi a'i babi'n cadw'n dda.

Mae Sacyr yn falch i weld cystal y mae'r prentisiaid ifanc yn ei wneud, ac yn edrych ymlaen at ddatblygiadau pellach ganddynt.

I ddathlu Diwrnod Canser y Byd, mae Canolfan Ganser Felindre yn cynnal Prynhawn Crefftau a fydd yn agored i holl aelodau'r cyhoedd, a bydd Sacyr UK, y contractwr sy'n adeiladu Canolfan Ganser Newydd Felindre, yno i roi help llaw.

Bydd gweithdy crefftau yn cael ei gynnal yn y ganolfan. Bydd y gweithdy'n canolbwyntio ar greu bathodynnau rhuban Diwrnod Canser y Byd i godi arian ar gyfer Gwasanaeth Canser Felindre, gan gefnogi ei ymdrechion i frwydro yn erbyn canser yng Nghymru.

Ymunwch â ni brynhawn Llun 2 Chwefror 2026, rhwng 2pm a 4pm yng Nghanolfan Ganser Felindre am sesiwn hwyliog i gefnogi achos da.

Dewch i helpu i wau, gwnïo, crefftio a chreu eitemau hardd gyda'n gilydd, ac i roi help llaw i greu rhywbeth gwirioneddol arbennig, gan godi arian ar yr un pryd.

Lledaenwch y neges – rydym yn edrych ymlaen at eich gweld chi yno!

Bu i Sacyr UK, y contractwr sy'n adeiladu Canolfan Ganser newydd Felindre, dreulio amser yn gwirfoddoli mewn elusen yng Nghaerffili ym mis Rhagfyr, a hynny'n rhan o'i addewid i gefnogi elusennau lleol dros gyfnod y Nadolig.

Mae Prosiect ToyBox, sydd wedi'i leoli yng Nghaerffili, yn un o'r elusennau y mae Sacyr UK yn ei chefnogi, ac mae'n darparu teganau newydd ac ail-law am ddim i blant o deuluoedd sy'n profi caledi ariannol.

Ymunodd aelodau o Dîm Buddion Cymunedol Sacyr UK, Jo O'keefe, Hannah Jenkins, Sam Rees, a Katie Hathaway, â chyd-weithwyr eraill Sacyr UK sy'n gweithio ar brosiect Canolfan Ganser newydd Felindre, gan gynnwys y Cydlynydd Logisteg Damian Talis, y Rheolwr Masnachol Anthony Robson, y Pensaer a'r Swyddog Technegol ar y Safle Adriana Lizeth Ramírez Hernández, yr arbenigwr Rheoli Prosiectau Andrea Toledo, a'r Pennaeth Caffael Javier Jorba Coloma, i gwrdd â Rheolwr Prosiect ToyBox, Donna Pearce O'Halloran, a groesawodd y tîm a'r cyfle i gael y gwirfoddolwyr i helpu gyda'r gweithgarwch cynyddol yn ystod tymor yr ŵyl.

Roedd tîm Sacyr UK yn canolbwyntio ar ddidoli a threfnu'r teganau i'w rhoi ar silffoedd i baratoi ar gyfer eu dosbarthu i deuluoedd mewn angen – aethant ati hefyd i brofi teganau i nodi unrhyw fatris diffygiol a sicrhau eu bod yn ddiogel.

Parhaodd y rhoddion i lifo i mewn trwy gydol y dydd, a bu'r tîm yn rheoli'r llwythi o deganau a ddaeth trwy'r drws. Bu'r tîm yn didoli dros dri bin o deganau ac yn ail-stocio llawr y siop i greu lle ar gyfer rhoddion newydd. Ar ben hyn, trefnodd isgontractwyr Sacyr, SGM Waste Management, bod cerbyd casglu sbwriel yn gwaredu teganau a oedd wedi torri neu'n ddiwerth, ac nad oedd modd eu casglu. 

Yn dilyn llwyddiant y diwrnod, ysbrydolwyd Cydlynydd Datblygu'r Gweithlu CBT, Hannah Jenkins, i wirfoddoli'n annibynnol i helpu'r Prosiect ToyBox ymhellach gyda'i ymdrechion cyflawni.

Cyd-weithwyr Sacyr UK ac Iwerddon Jo O’keefe, Hannah Jenkins, Sam Rees, Katie Hathaway, Damian Talis, Anthony Robson, Adriana Lizeth Ramírez Hernández, Andrea Toledo, a Javier Jorba Coloma, ynghyd â Donna Pearce O’Halloran o Brosiect ToyBox.

Mae Canolfan Ganser newydd Felindre wedi croesawu pedwar aelod newydd i fwrdd Llysgenhadon Acorn. 

Mae'r cynllun Llysgenhadon Acorn wedi bod ar waith ers i'r prosiect dorri tir, ac mae'n rhoi cymorth a chyngor ar gynllun budd cymunedol arfaethedig a phresennol y prosiect. Mae'n cyfathrebu newyddion i breswylwyr lleol ac yn mynychu digwyddiadau cymunedol i feithrin ymwybyddiaeth o werthoedd cymdeithasol y prosiect. Mae ei aelodau hefyd yn eiriol dros y prosiect i'r gymuned leol. 

Mae pedwar aelod newydd o'r bwrdd bellach wedi cael eu recriwtio i'r cynllun, gan gryfhau ymhellach y cysylltiadau rhwng prosiect Canolfan Ganser newydd Felindre a chymunedau ac elusennau ledled Caerdydd a'r rhanbarth lleol. 

Mae Lindsay Doyle, dyn busnes lleol a chodwr arian ar gyfer elusennau, wedi cael ei recriwtio i'r bwrdd. Mae'n dod â phrofiad helaeth o'r sector ariannol, yn ogystal ag o faes codi arian, ac mae'n gymeriad adnabyddus ym myd busnes Caerdydd. 

Mae'r cerddor a'r fyfyrwraig leol, Meg Uppington, sy'n beiriannydd technegol gyda Diff Radio, hefyd wedi cael ei phenodi i'r bwrdd. Mae'n cynnig gwybodaeth werthfawr am ddiwylliant ieuenctid lleol a thueddiadau sy'n dod i'r amlwg. 

Mae aelod arall o dîm Diff Radio, Matt Cutrupi, hefyd wedi cael ei benodi. Matt yw rheolwr Diff Radio. Yn ogystal â rhedeg ei fusnesau ei hun, mae ganddo wybodaeth helaeth am ymgysylltu â'r cyfryngau cymdeithasol, cysylltiadau ieuenctid, a thueddiadau diwylliannol, sy'n golygu ei fod yn ychwanegiad defnyddiol iawn i'r bwrdd. 

Mae Cyfarwyddwr Asiantaeth Farchnata Edie & Ludlow, Alexandra Otley, sydd hefyd yn godwr arian ar gyfer Felindre, wedi ymuno â'r bwrdd yn ogystal. Roedd hanes blaenorol cadarn Alex o godi arian, yn arbennig ar gyfer y ganolfan ganser, ynghyd â'i sgiliau o ran marchnata byd-eang a strategaeth ddigidol, yn golygu ei bod yn ymgeisydd amlwg. 

Mae bwrdd Llysgenhadon Acorn yn cael ei gadeirio gan Reolwr Buddion Cymunedol Sacyr UK, Katie Hathaway, a'i gefnogi gan aelodau o Dîm Buddion Cymunedol Canolfan Ganser newydd Felindre. 

Mae ceisiadau am aelodau newydd o'r bwrdd yn dal i fod yn agored, a dylai partïon sydd â diddordeb wneud cais trwy'r ddolen ganlynol i Microsoft forms: 
Ffurflen Gais Llysgenhadon Acorn – llenwi'r ffurflen

Roedd yn bleser gan Ymddiriedolaeth GIG Prifysgol Felindre groesawu Prif Swyddog Meddygol Cymru am ymweliad a roddodd olwg gynhwysfawr ar y gwaith eang sydd yn cael ei wneud ar draws yr Ymddiriedolaeth, a'r cynnydd sydd yn cael ei wneud ar y Ganolfan Ganser Felindre newydd. 

Penodwyd yr Athro Isabel Oliver yn Brif Swyddog Meddygol Cymru ym mis Ebrill 2025 ac yn ei rôl, mae hi’n darparu arweinyddiaeth glinigol a chyngor proffesiynol annibynnol i Lywodraeth Cymru ynghylch materion iechyd ac iechyd y cyhoedd. 

Roedd ymweliad yr Athro Oliver yn gyfle hefyd i arddangos maint safle newydd Canolfan Ganser Felindre, yr uchelgais glinigol y tu ôl i'r prosiect, a'r manteision y bydd y ganolfan newydd yn eu cynnig i gleifion, teuluoedd a staff. 

Yn ystod yr ymweliad, clywodd yr Athro Oliver gan nifer o gydweithwyr ar draws yr Ymddiriedolaeth a oedd yn tynnu sylw at ein blaenoriaethau sefydliadol, yn trafod y cefndir o ran datblygu’r Ganolfan Ganser Felindre newydd, rôl ac effaith Gwasanaeth Gwaed Cymru, ein dull o arwain yn y maes meddygol, a chryfderau cynyddol ein portffolio ymchwil a datblygu.  

Dywedodd Prif Weithredwr Dros Dro Ymddiriedolaeth GIG Prifysgol Felindre, Carl James: “Roedd yn fraint croesawu’r Prif Swyddog Meddygol a rhoi darlun llawn o waith yr Ymddiriedolaeth - o rôl genedlaethol hanfodol Gwasanaeth Gwaed Cymru i’r cynlluniau trawsnewidiol ar gyfer ein Canolfan Ganser Felindre newydd o’r radd flaenaf. Tynnodd yr ymweliad sylw at yr angerdd, yr arbenigedd a'r penderfyniad sydd yn cael eu darganfod ar draws ein timau, a'r ymrwymiad a rennir ar draws GIG Cymru i ddarparu'r gofal o'r ansawdd uchaf a'r canlyniadau gorau i'n cleifion a'n rhoddwyr.

Cafodd y Prif Swyddog Meddygol daith o amgylch safle’r Ganolfan Ganser Felindre newydd, lle cafodd weld y cynnydd sydd yn cael ei wneud o lygaid y ffynnon, a chwrdd ag aelodau o dîm y prosiect sy’n arwain y gwaith o’i ddatblygu. 

Meddai’r Athro Isabel Oliver, Prif Swyddog Meddygol Cymru: “Roeddwn i wrth fy modd yn ymweld â safle’r Ganolfan Ganser newydd, a gweld y cynnydd sydd yn cael ei wneud. Fe wnaeth uchelgais y tîm i wella canlyniadau iechyd i bobl Cymru a gwneud Cymru yn arweinydd byd ym maes triniaeth canser greu argraff fawr arnaf, ac rwy'n edrych ymlaen at weithio gyda nhw i wireddu hyn.”

Dangosodd yr ymweliad raddfa'r adeilad, y weledigaeth glinigol sy'n llunio dyfodol gofal canser i ddarparu gofal gwell i gleifion, a'r nodweddion cynaliadwy sydd wedi cael eu dylunio, gyda chleifion a staff wrth wraidd y gwaith.

Meddai Dr Jacinta Abraham, Cyfarwyddwr Meddygol Gweithredol, Ymddiriedolaeth GIG Prifysgol Felindre: “Roedd yr ymweliad yn foment bwysig i ddangos yr uchelgais glinigol sy’n sail i bopeth rydym yn ei wneud ar draws yr Ymddiriedolaeth.” O ymchwil ac arloesedd i arwain yn y maes meddygol a dylunio ein Canolfan Ganser Felindre newydd, ein ffocws ydy gwella canlyniadau a chreu gofal o'r ansawdd uchaf i bobl ar draws Cymru. Roedd yn bleser gennym rannu’r weledigaeth honno gyda’r Prif Swyddog Meddygol.” 

Tanlinellodd yr ymweliad ymdrech barhaus Felindre i ddarparu gwasanaethau o'r radd flaenaf i bobl Cymru, a'r cynnydd rydym yn ei wneud tuag at agor Canolfan Ganser Felindre newydd yn nhymor y Gwanwyn 2027. 

Cynhaliodd Sacyr UK, y prif gontractwr sy'n adeiladu Canolfan Ganser Newydd Felindre, fore coffi ar gyfer ei dîm budd cymunedol a'r is-gontractwyr sy'n helpu i adeiladu'r ganolfan. Yn ystod y bore coffi, trafodwyd ymrwymiad Sacyr i werth cymdeithasol a'r effaith gadarnhaol y bydd y prosiect yn ei chael ar y gymuned.

Roedd cynrychiolwyr yn bresennol o blith chwe is-gontractwr sy'n gweithio ar y prosiect, gan gynnwys Nelco Radiation Shielding, Mac Scaffolding, Pacegrade, Falcon 3, a'r arbenigwyr awyru, Zitron.

Yn arwain y trafodaethau yr oedd Rheolwr Ymgysylltu â Rhanddeiliaid a Buddion Cymunedol Sacyr UK, Katie Hathaway, y Cydlynydd Buddion Cymunedol, Jo O'Keefe, a Chydlynydd Datblygu'r Gweithlu, Hannah Jenkins.

Yn rhan o'r bore, bu Sacyr UK a'i is-gontractwyr yn trafod y modd y gallant gefnogi amcanion gwerth cymdeithasol y prosiect yn fwy effeithiol a chreu syniadau newydd i helpu ac ymgysylltu â'r gymuned leol.

Dywedodd Cydlynydd Datblygu'r Gweithlu ar gyfer Sacyr UK, Hannah Jenkins: “Rydym yn deall pwysigrwydd gwerth cymdeithasol ac am wneud gwahaniaeth ystyrlon y tu hwnt i’r gwaith yr ydym yn ei gyflawni.

“Yma yn Sacyr UK, rydym wedi ymrwymo i gefnogi mentrau sy’n cryfhau’r gymuned leol, a hynny trwy greu cyfleoedd i sicrhau effaith gadarnhaol ein prosiect. Hoffem ddiolch i'r is-gontractwyr a oedd yn bresennol yn y bore coffi ac a gyfrannodd mewn modd cadarnhaol at y drafodaeth ynghylch sut y gallwn wasanaethu'r gymuned leol yn well.”

Yn ddiweddar, roedd aelodau o dîm Datblygu Cymunedol a Datblygu'r Gweithle Sacyr UK yn ffair swyddi Dydd Mawrth Porffor yng Nghanolfan Dewi Sant yng nghanol dinas Caerdydd, lle roeddent yn annog a chefnogi pobl ag anableddau i ddychwelyd i'r gwaith.

Wedi ymuno â Hannah Jenkins a Katie Hathaway o Sacyr UK yn y ffair oedd Dan Biddle, Prif Weithredwr y Gwasanaeth Cyflogaeth a Chynghori Cenedlaethol ar gyfer Amrywiaeth, a threuliasant y prynhawn yn ymgysylltu â siopwyr, gan eu cyflwyno i'r cyfleoedd gyrfaol sydd ar gael yn y diwydiant adeiladu, a helpu pobl sy'n cael trafferth dod o hyd i waith.

Rheolwr adeiladu oedd Dan Biddle ar ddechrau ei yrfa, cyn iddo gael ei anafu'n ddifrifol yn ymosodiadau terfysgol Llundain yn 2005. Treuliodd flwyddyn yn yr ysbyty cyn iddo allu ailadeiladu ei fywyd, ailhyfforddi i fod yn ymgynghorydd mynediad, ac ennill ei statws ar Gofrestr Genedlaethol yr Ymgynghorwyr Mynediad (NRAC) yn 2007. Mae bellach yn gweithio'n ddiflino i sicrhau mynediad at gyfleoedd gyrfaol i bobl ag anableddau, a hynny trwy ei gwmni, Nationwide Access Consultants.

Mae Sacyr UK, y contractwr sy'n adeiladu'r ganolfan newydd, Canolfan Ganser Felindre (nVCC), yn bwriadu lansio menter trwy ei Academi Cyflogaeth Mynediad i'r Anabl  (Disability Access Employment Academy), a hynny mewn partneriaeth â'r Gwasanaeth Cyflogaeth a Chynghori Cenedlaethol ar gyfer Amrywiaeth, er mwyn helpu a chefnogi pobl anabl i gael cyflogaeth ystyrlon, yn ogystal â darparu amgylchedd cynhwysol iddynt.

Dywedodd Katie Hathaway, y Rheolwr Ymgysylltu â Rhanddeiliaid a Buddion Cymunedol yn Sacyr UK: “Mae’n bwysig helpu’r bobl hynny sydd ag anableddau, a chreu llwybr yn ôl i’r gwaith iddynt allu adfer eu hyder a sicrhau nad yw eu cyfleoedd yn cael eu cyfyngu gan amgylchiadau.

“Roedd ffair swyddi Dydd Mawrth Porffor wedi rhoi dealltwriaeth ddyfnach i ni o'r modd y gallwn gynorthwyo pobl anabl i gael gwaith, elfen a fydd yn helpu i ddarparu sefydlogrwydd ariannol iddynt. Rydym yn edrych ymlaen at bartneru â Nationwide Access Consultants i ymgysylltu â'r bobl hyn yn y gymuned a chreu cyfleoedd ar eu cyfer.”